पुरुषोत्तमाची आरती

गोलोक म्हणुनी ध्यातो मी देवा । सुरवर मुनिवर भावे करिती तव सेवा ।।
तव चरणांचा देई अखंड मज ठेवा । पुरुषोत्तमा रक्षी सत्वर वर दयावा ।। १ ।।
जयदेव जयदेव जय पुरुषोत्तमा, केवळ करुणासिद्धी पुरविसी मत्कामा ।। धृ ।।

असंक्रांती मास बहुप्रीय तूते । स्नान नक्त मौन करी उपोषणाते ।।
दीप वस्त्र अन्न देई अपुपाते । अश्वथ पूजा करिता बहु पुण्य होते ।। २ ।।

गोमय गोमुत्र तिलाम्ल स्नान । धरणा पारणा जे करी उद्यापण ।।
भक्ती भावे हो निज संतर्पण । मेहुण सांगून त्या दे वायनदान ।। ३ ।।

तुळस गोसेवा भक्ती जे करिती । मानुनी तुझे रूप अदभूत सुख घेती ।।
करुनी नामस्मरण पूर्वज उद्धरिती । द्वारका लक्ष्मना अंती द्या मुक्ती ।। ४ ।।